Smartphone par ab tak sunlight mein koi bhi message padhna ya notification check karna thoda mushkil raha hai. Lekin ab is problem ko solve karne ke liye scientists ne ‘invisible glass’ khoj nikala hai . Ye glass ab smartphone par hone wali reflection problem ko jald hi solve karega.

Aaj ke samay mein lagbhag sabhi electronic devices mein ek glass ya plastic ki coating isliye lagaayi jati hai taaki use dust, moisture ya other environmental contaminants se bachaaya jaa sake. Lekin sunlight mein jaane par kaafi smartphones ko use karna mushkil ho jata hai aur iske liye abhi tak kuch khaas intezaam kiye bhi nahi gaye the.

Lekin ab is mushkil ko hal karne ke liye Pune ke Indian Institute of Science Education and Research (IISER) aur US ke Center Functional Nanomaterials (CFN) ne ek method bataya hai jismein glass surface se surface reflection ko kam karne ke liye nanoscale features ko lagbhag zero hi kar diya hai, taaki sunlight mein smartphones ka use easily kiya jaa sake.

Jab bhi koi light ek medium se doosre medium mein enter karti hai, to light ka ek particular hissa reflected ho jata hai. Nanoscale features mein wo effect hote hain jo refractive index ko dheere dheere hawa se lekar glass tak pahunchne par change kar dete hain taaki reflection se bacha jaa sake.

Ye ultra-transparent nano textured ‘invisible glass’ anti reflective hoga jo light ka pratibimb yaani ki reflection aapke smartphone par nahin padne dega. Isse reflection ko behad kam kiya jaa sakega taaki aap sunlight mein bhi aaraam se phone use kar sakein aur saath hi ye wide range of viewing angles ke saath aayega.

Ye ‘invisible glass’ kewal sunlight hi nahi, balki har tarah ki light ke reflection ko kam karne mein saksham hoga. Ye invisible glass kewal smartphone user ke experience ko improve karne mein hi nahi balki solar panels ke energy consumption ko badhaane mein bhi kaargar hoga.

Solar panels par jab sunlight padti hai to wahaan bhi reflection hota hai. Agar is ‘invisible glass’ ko in solar panels par lagaaya jaaye to yahaan se sunlight reflect n hokar poori tarah se in par aayegi aur in panels ki energy conversion ki kshamta adhik badh jaayegi.

Well, agar ‘invisible glass’ ki khoj ho gayi hai to implementation bhi jald hi hone ki ummid hai.