IFA 2017 ki official shuruaat se thik pehle Sony ne apna latest flagship smartphone announce kiya, jiska naam hai Xperia XZ1.

Xperia XZ1 haal hi mein launch huye operating system Android 8.0 Oreo ke saath aane wala pehla smartphone hai. Is smartphone ki aur highlight ye hai ki ismein 3D scanning mode hai jiske dwara iska camera kisi bhi cheez ko scan karke use 3D tasveer ke roop mein save kar sakta hai.

Other specifications ki baat karein tab bhi Xperia XZ1 vaastav mein ek flagship smartphone hi hai. Ismein 5.2 inch ki full HD HDR Triluminos display hai jismein X Reality aur Corning Gorilla Glass 5 protection moujood hai. Is dual SIM smartphone mein Octa Core Qualcomm Snapdragon 835 processor hai, saath hi 4GB ki RAM aur 64GB ki internal memory bhi hai jise aap expandable slot ki sahayta se 256GB tak badha sakte hain.

Xperia XZ1 mein 19 MP ka auto focus Motion Eye rear camera hai jo Exmos RS sensor, f/2.0 aperture, 4K video recording, triple image sensing technology aur 960fps slow motion video jaise behtareen features ke saath aata hai. Front camera ki jagah aapko 13 MP ka sensor milega jismein 1/3″ Exmor RS sensor, f/2.0 aperture aur full HD video recording karne ki capabilities hongi. Is smartphone ki ek khaasiyat ye bhi hai ki ismein right edge par camera shutter button bhi moujood hai.

Xperia XZ1 ek dust aur water resistant handset hai jismein Digital Noise Cancelling jaise features bhi hain. Home button mein fingerprint sensor bhi moujood hai aur 2700mAh ki battery bhi hai jo Qnovo Adaptive Charging technology ke saath aati hai. Connectivity features mein shaamil hain- 4G VoLTE, Wi-Fi 802.11 ac MIMO, Bluetooth 5.0, GPS/ GLONASS, NFC, USB 3.1 Type C port.

Sony Xperia XZ1 ko chaar colors mein launch kiya gaya hai jismein Moonlit Blue, Venus Pink, Warm Silver aur Black color shaamil hain. Company ka kehna hai ki September 2017 ke mahine mein hi ye smartphone lagbhag sabhi countries mein available hoga, haalanki iske liye koi specific date ki announcement nahi ki gayi hai aur iski pricing details ka aana bhi abhi baaki hai.