Aakhirkaar, Gionee ne aaj apna pehla bezel-less smartphone India ki Raajdhaani mein yaani ki New Delhi India mein ek event mein launch kar hi diya aur iska naam hai M7 Power. Ye smartphone ek mahine pehle Thailand mein launch kiya gya tha aur iski kimat lagbhag 20,000 INR thi. India mein ye smartphone Gold color with laser engraved finish, Black and Dark Blue in laser drilled finish color variants mein available hoga aur iski kimat Rs. 16,999 hogi.

Yadi hum specifications par gaur karein to, M7 Power 6 inch ki HD+ full view display ke saath aayega jis par 2.5D curved glass layer bhi hai. Ismein 5000mAh ki badi battery hai jo company ke anusaar poore 2 din tak aapke smartphone ka saath degi.

M7 Power mein 13 MP ka rear camera hai jo LED flash light, f/2.0 aperture aur PDAF ke saath aayega. Selfie lene ke liye ismein 8 MP ka front camera diya gaya hai. Software ki baat karein to, ismein company ka apna UI Amigo 5.0 OS hai jo Android 7.1.1 Nougat OS par based hai.

M7 Power 1.4 GHz Octa Core Qualcomm Snapdragon 435 processor dwara sanchaalit hota hai jismein Adreno 505 GPU aur 4GB ki RAM bhi shaamil hai . Iski internal memory 64GB ki hai aur memory ko additional 256GB tak badhaane ke liye microSD card bhi diya gya hai.

Is smartphone mein hybid dual SIM slot diya gaya hai yaani ki ek waqt par aap ya to 2 SIM laga sakte hain ya fir ek SIM aur ek microSD card. Iske connectivity options hain- 4G VoLTE, 3G / HSPA+, EDGE / GPRS, Wi-Fi 802.11 b/g/n, Bluetooth 4.2, GPS, Micro USB port aur 3.5mm audio jack.