Google ne isi mahine ke shuruaat mein Google Home Mini smart speaker launch kiya tha, jo ki Google Home ka small version hai. USD 49 mein milne waala Google Home Mini bahaar ke deshon mein already available hai, lekin India mein abhi iske launch ki koi confirmation ya baatein nahin chali hain.

Google Home Mini, Amazon ke Echo Dot ka strong competitor hai, jiski unboxing aur ek chota sa review hum aapke saath share karne waale hain.

Google Assistant dwara chalne wala ye Google Home Mini ek future speaker kaha jaa sakta hai, jo aapke saare kaam behad aasaani se karega. Aaiye aapko bataate hain ki kis tarah aap iska istemaal apne kaamon ko aasaan banaane ke liye kar sakte hain.

Sabse pehle to aap ise iske saath aane waale adapter ke zariye power dein aur apne smartphone par ise chalaane ke liye Google Home app Play Store se download karein aur ise apne Google account se link karein. Iske baad Google Home Mini Speaker aapke ghar ke Wi-Fi se connect ho jaayega aur saath hi aapki koi bhi voice command accept karne ke liye taiyaar bhi ho jaayega.

Ismein aapko left side mein volume down karne ka option hoga aur right side par volume increase karne ka. Niche ki taraf mic mute karne ka button aur micro USB port diya gaya hai.

Ye chota sa Google Home Mini speaker behad clarity ke saath aapke voice commands ko sunta hai aur aapke sawaalon ke sahi jawaab bhi deta hai. Aaiye dekhte hain ki aap is smart speaker ke saath aur kya kar sakte hain.

  1. Internet par uplabdh koi bhi jaankari paane ke liye aap iska istemaal kar sakte hain, jaise ki aap Google dwara karte hain, bas difference itna hoga ki wahaan aap questions type karte hain aur yahaan aapko Google Home Mini se sahi sawaal poochna hai.
  2. Google Home Mini par Play Music, Spotify, etc. apps ke dwara music stream kar sakte hain.
  3. Iske dwara simple calculations, alarm, reminder, etc. bhi aasaani se set kar sakte hain.
  4. Google Home Mini ko voice command dekar koi translation, words ke meaning, kisi bhi city ka temperature, etc, aap jaan sakte hain.
  5. Iske saath aap apne ghar ke smart devices jaise ki chromecast, Philips Hue smart bulb, Thermostat, etc. ko control kar sakte hain.
  6. Apne aas-paas ke hospitals, restaurants, schools, etc ke baare mein information le sakte hain. Taxi jaise ki Uber, Ola cabs book kar sakte hain.
  7. Google Home Mini ke saath aap games bhi khel sakte hain. Mail check kar sakte hain, ye aapko aapke calendar ke anusaar reminder bhi deta hai.

Basically, agar hum kahein to Google Home Mini smart speaker, aapke assistant ki tarah kaam karega aur aapko koi bhi chiz bhulne nahi dega. Haalaanki India mein ye abhi available nahin hai, lekin yadi aap ise bahaar se bhi mangwaate hain, to ye behad achhi chiz hai jo aapke kaamon ko thoda aasaan bana deti hai.

Humein comments ke zariye ye zaroor bataayein ki Google Home Mini ki ye jaankaari aapko kaisi lagi.