Aaj se yaani ki 27th September se India ke pehle Mobile Congress ka agaaz ho chuka hai, jo aane waale varshon mein ek global event ban jayega.  Telecom Minister Manoj Sinha ke aadesh ke par Telecom Department ab har saal India Mobile Congress (IMC) ka aayojan karega.

Bharat mein pehli baar IMC ka aayojan bade hi bhavy tareeke se kiya gya hai, jahaan Prime Minister Narendra Modi, Telecom industry ke leaders Mukesh Ambani, Sunil Bharti Mittal, Kumar Mangalam Birla, IT Minister Ravi Shankar Prasad jaisi kayi hastiyaan bhi shaamil huyi hain.

Is avsar par Telecom Minister Manoj Sinha ka kehna hai ki, “Humein garv hai ki hamaare desh mein pehli baar mobile, internet aur technology desh ke apne India Mobile Congress mein aa rahe hain.”

Is event mein 150 foreign delegates aur 8 embassies shaamil huin jinmein US, the United Kingdom, Finland, Sweden aur Israel bhi sammilit hain.

India Mobile Congress mein Google IT, Facebook, Nokia, Huawei, Jio Phone, ZTE, LG, Qualcomm aur MediaTek jaisi kayi badi company hissa le rahi hain.

COAI ke Director General, Rajan S Mathews ka kehna hai ki, “ IMC, mobile handset body Indian Cellular Associations and IT industry body Nasscom ka ek joint event hain jahaan Vivo, Nokia, Oppo, LG, Huawei aur Lava jaisi kayi badi companies apne naye products ko introduce karengi. Ye event public ke liye open hai, bas aapko IMC ki website par register karna hoga.

Saath hi isi event mein Mukesh Ambani ne bhi sabha ko sambodhit karte huye apni speech di aur kaha ki India mein mobile data new oil hai aur hamaare desh ko bahaar se data import karne ki koi zaroorat nahi hai. Is samay ek industry ke roop mein, hamaare paas tools ke saath 1.3 billion  logon ko naukri dene ka zaroori kaam baaki hai. Reliance Jio ke paas ek saal ke andar hi 100 million se jyada subscribers hain aur humein affordable prices par Indian mein sabhi logon ko high speed internet data bhi provide karna hai.”

India World Congress ka aaj pehla hi din hai jahaan LG ne apna ek budget handset K7i launch kiya hai. Ajj se aarambh hokar Friday tak chalne waale is event mein kaun kya launch karta hai, iski update hum aapko dete ranhenge.