iVoomi ne isi saal ke shuruaat mein apne smartphones Me 1 aur Me 1+ ke saath India mein apna pehla kadam rakha. Aaj is Chinese company ne fir se apne 2 affordable smartphones bhaarat mein launch kiye hain jinka naam hai- iVoomi Me 3 aur Me 3s.

iVoomi Me 3 aur Me 3s jinki kimat 5,499 INR aur 6,499 INR hai, ka main feature inka shatterproof display hai. Ye dono smartphones aapko kewal Flipkart par Midnight Black colors mein milenge, jo aaj se hi kharidne ke liye available hain.

iVoomi Me 3 aur Me 3s mein 5.2 inch ki HD display hai jis par 2.5D curved glass ki coating ki gayi hai aur ye dono hi 64-bit quad core MediaTek MT6737 processor par chalte hain. Android 7.0 Nougat software dwara sanchaalit hone waale in smartphones mein microSD card slot bhi hai jiske dwara memory ko additional 128GB tak badhaya bhi jaa sakta hai.

Dono smartphones mein jo antar hai wo storage aur camera ka hai, iVoomi Me 3 mein 2GB RAM ke saath 16GB ki internal memory hai. Is dual SIM handset mein 8 MP ka front aur 8 MP ka auto focus rear camera hai jo LED flash light ke saath aata hai.

Doosri taraf, Me 3s aapko 3GB RAM aur 32GB onboard storage ke saath milega. Me 3s mein 13 MP ka auto focus rear shooter jo 1.0 micron Samsung sensor ke saath aur 8 MP ka front camera moujood hai. Dono hi handsets ke rear cameras mein HDR aur panaroma modes available hain.

iVoomi Me 3 aur Me 3s dono hi smartphones 3000mAh ki battery ke sath aayenge jinmein turbo battery power saver aur fast charge 2.0 support bhi hai. Inke connectivity features hain – 4G VoLTE, 3G / HSPA+, EDGE / GPRS, Wi-Fi 802.11 b/g/n, Bluetooth 4.0, USB OTG, Micro USB 2.0 port, 3.5mm audio jack aur dual SIM connectivity.