Aaj hum aapke liye Jio 4G enabled feature phone jo pichle saptaah 21 July ko Reliance Chairman Mukesh Ambani dwara launch kiya hai, ka vistrit vivran lekar shaamil hain. Is phone ke market aane ki date aur isse sambandhit plans ke baare mein to hum jaan chuke hain, lekin iske features ko lekar logon ke man mein abhi bhi sandeh hai.

Jio Phone jismein 4G ke saath Wi-fi connectivity bhi milegi, 24 august se pre-booking ke liye uplabdh hoga. September ki shuruaat se yeh phone logon ko “first come, first serve” basis par uplabdh karwaaya jaa sakega.

Ye phone aapko bilkul free of cost milega, jee haan aap sahi padh rahe hain, is phone ki kimat hai Rs. 0, lekin aapko Rs. 1500 deposit ke roop mein company ko dene honge, jo teen saal baad is used phone ko waapas krne par aapko refund kar diye jaayenge. Yaani ki pehla esa phone jise 3 saal tak istemaal kar lene ke baad wapas company ko dene par aapko poore paise wapas mil jayenge. Not a bad deal at all !

Ab yadi hum specifications ki baat karein to, Jio Phone 2.4 inch ki QVGA display ke saath aayega, ismein rear camera bhi hoga lekin kitne mega-pixel ka, ye nahin kaha jaa sakta. Is feature phone mein 2000mAh ki battery hogi, jo is phone ko mixed usage ke saath poora din chalaane ke liye kaafi hai.

Jio Phone mein aapko 512MB ki RAM aur 4GB internal memory milegi jise aap microSD card ke zariye 128GB tak aur badha sakte hain. Saath hi Jio Phone par aap jo bhi dekhein ya chalaayein jaise ki koi movie, game ya facebook jaisi app, aap ye sab apni TV par cast bhi kar sakte hain.

Jio Phone mein aapko voice command ka option bhi mil raha hai jo 22 indian languages dwara supported hoga aur aap apni bhasha mein kisi ko message ya call karne ke liye ise voice command de sakte hain.

Jio Phone mein Kai OS naamak software hai jo ek open source network hai. Ab hum aapko bataate hain ki ismein kaun si app available hain. Jio Phone mein Jio ki sabhi app jaise ki Jio Cinema, Jio TV, Jio Express News, Jio Music aur PM Modi ki app ‘Mann ki baat’, Facebook, ityaadi kayi applications aayengi. Iske atirikt jo log Whats app ka adhik upyog karte hain, wo bhi jaan na chahte hain ki ismein ye application hai ya nahin, to Whats app Jio Phone mein uplabdh nahin hai, lekin aane waale samay mein ho sakti hai.

Ab yadi SIM card slot ki baat karein to Jio Phone mein sabse badi kami yeh hai ki ye ek single SIM based feature phone hai jismein kewal Jio 4G ki hi SIM lag sakti hai, aur kisi bhi company ki 4G SIM ismein kaam nahi karegi. Saath hi khabar yeh bhi hai ki is phone ke liye aapko Jio 4G ki bhi nayi SIM leni padegi, lekin shayd aane waale samay mein kuch aisa ho ki aapki purani Jio SIM ismein chal sake.

Jio Phone mein aap Rs. 153 per month ka ya Rs. 309 per month ka plan le sakte hain. Iske alawa company ne Rs. 24 ka 2 days plan aur Rs. 54 weekly plan jaise chote plans bhi announce kiye hain.

Sharmaji Technical