Jio Phone jo logon ko lagbhag muft mein mil raha hai, ko challenge karne ke liye Airtel ne Karbonn ke saath milkar aaj apna bhi aisa hi ek phone launch kiya hai, jiska naam hai Airtel Karbonn A40 India jo 1,399 INR ki effective cost par uplabdh hoga. Lekin kya ye bhi aapko Jio jitne kifaayati offers de sakega ?

Aaiye dekhte hain ki Jio Phone ke comparison mein Airtel Karbonn A40 India aapke liye kya offer lekar aaya hai.

Effective Cost

Reliance ne isi saal Jio Phone ki announcement ki thi aur ab Jio Phone first come first serve basis par kewal 1500 INR mein logon tak pahunchne bhi laga hai. Jabki Airtel Karbonn A40 India, jo aaj hi launch hua hai ka price 2,899 INR hoga.

In dono phones ka lock-in period 3 saal ka hai, lekin Jio Phone ko lautaane par aapko poore 1,500 INR wapas milenge. Doosri taraf Airtel Karbonn A40 India bhi aapko 3 saal ke liye milta hai, lekin isko wapas karne par company aapko kewal 1,500 INR wapas degi. Jio Phone ka effective cost Rs. 0 hai, lekin Airtel Karbonn A40 aapko 1,399 ke effective price par mil raha hai. Zaahir hai ki Jio ka offer kahin behtar hai.

Recharges

Ab yadi recharges ki baat ki jaaye to, in 3 saalon mein Jio Phone mein aapko minimum 4,500 INR ka recharge karwana hoga, jiska arth hai Rs. 1,500/ year aur Rs. 125 /month. Doosri or Airtel ke is smartphone mein aapko in 3 saalon mein minimum 6,000 INR ka recharge karwana hoga, means 2,000 / year aur Rs. 205 /month. To yahaan bhi Jio feature phone, Airtel ke smartphone par bhari padta dikh raha hai.

Ab agar Tariff plans ki baat karein to, Jio Phone ke 28 days tariff plans ka aarambh Rs. 153 se hota hai aur Airtel Karbonn A40 India ka 28 days ka sabse sasta tariff plan 169 INR mein milega.

Internet Data Limit

Jio Phone mein 153 INR mein aapko 28 days tak unlimited data milta hai, jismein 1GB high-speed data per day milta hai aur use exceed karne par baaki ke din ke liye iski speed 128kbps ho jaati hai. Wahin Airtel ke smartphone mein aapko 0.5GB high speed data per day milega, lekin yadi aap is limit ko cross karne ke baad bhi internet use karte hain to Rs. 4,000/ GB ka charge aapko dena hoga.

Ab aap hi decide kijiye aapko kaun sa connection chahiye.

SMS

SMS mein bhi Jio Phone, Airtel Karbonn A40 India se kahin aage hai. Jio Phone 153 INR ke tariff plan mein aapko 300 free messages deta hai. Lekin Airtel, 169 INR ke plan mein aapko koi free messages nahin deta, ismein aapko Re. 1/SMS for local and Rs. 1.5/SMS for STD charges dene honge.

Roaming

Jio Phone aapse koi roaming charges nahin leta, lekin Airtel ke is offer mein aapko har call par 80p se lekar Rs. 1.15 tak roaming charges dene honge.

Battery

Jio feature phone mein aapko 2000mAh ki battery milti hai, jo lagbhag 2 din tak saath degi. Wahin Airtel Karbonn A40 jo ki ek smartphone hai, mein kewal 1400mAh ki battery di gayi hai.

Other feature

Airtel Karbonn A40 aur Jio Phone dono mein microSD card slot moujood hain, lekin Jio Phone mein aap 128GB tak ka card laga sakte hain, wahin Airtel ke is smartphone ka microSD card kewal 32GB tak ka card accept karta hai. Airtel Karbonn A40 India ko aap TV se connect nahi kar sakte, jabki Jio Phone ek cable ke through direct TV se connect hota hai.

Conclusion

Airtel Karbonn A40 India, jise Airtel ne “Mera pehla 4G smartphone” tagline ke saath aaj Jio Phone ke competition mein launch kiya hai, wo Jio Phone se har maamle mein kam hi nazar aa raha hai. Chahe phone ka price ho, internet data ya fir battery aur memory jaise specs Jio Phone ek feature phone hokar bhi Airtel Karbonn A40 se kahin aage hai.