Lava ne haal hi mein apne 4 Z-series handsets India mein launch kiye hain. Inke naam – Z60, Z70, Z80 and Z90 hain. Lava ne is baar in smartphones ke saath aisa challenge ya yun kahein ki offer diya hai, jo pehle kabhi kisi company ne nahi diya. Is offer ke according yadi aap inmein se koi bhi smartphone kharidte hain aur kuch din use karne par aapko wo pasand nahi aata to aap 30 din ke andar is smartphone ko return kar apne paise wapas paa sakte hain.

Aaj inhi 4 Z-series ke smartphones ki unboxing ke baare mein aap is article mein padh sakte hain aur jaan sakte hain ki inke saath aur kya accessories aapko milegi aur inke looks kaise hain.

In sabhi smartphones ki kimat 5,500 INR se 11,000 INR ke beech hai aur sabhi ki specifications unke price ke according behad sahi hain. Looks ki baat karein to chaaron smartphones premium aur classy looks ke saath aaye hain saath hi sabke saath aapko back cover aur screen guard bhi mil raha hai. Aap apne budget ke according ismein se kisi bhi smartphone ko chun sakte hain.

Z90 3GB ki RAM aur 32GB ki onboard storage ke saath aata hai. 10,750 INR ki kimat mein milne waale is handset mein dual rear cameras hain (8 MP + 2 MP) aur iska front camera bhi 8 MP ka hai jismein flash bhi moujood hai. Dono front aur rear cameras mein aapko bokeh effect bhi milta hai. Saath hi in dono cameras se click ki gayi images mein colors bhi natural hai aur detailing bhi achhi hai. Z90 mein 3000mAh ki battery hai aur ye matte finish ke saath aayega.

Z80 ki baat karein to ye glassy look ke saath milega aur ye bhi ek lightweight phone hai. Sabhi smartphones ki tarah ismein bhi removable battery aayegi jo 2500mAh ki hai. 3GB RAM aur 16GB ROM ke saath aane waale is smartphone mein 8 MP ka rear camera hai aur selfie camera ka resolution 5 MP hai. Ismein 5 inch ki HD display hai aur ye 1.3 GHz quad core processor dwara sanchaalit hota hai. Iske saath box mein aapko back cover, screen guard, battery, charger aur ear-phone milta hai.

Lava Z70 humein Black color mein mila hai jo dekhne mein behad premium hai aur saath hi rounded edges ke saath aane waale is phone mein rear panel par aapko fingerprint scanner bhi milta hai. Z70 ki kimat kewal 8,000 INR hai aur price ko dekhte huye iske looks behad achhe hai. Ismein bhi aapko 5 inch ki HD display, 2GB ki RAM, 8 MP rear aur 5 MP front camera aur dono mein bokeh effect bhi milta hai. Ismein bhi aapko Z80 ki tarah sabhi box accessories milti hain. Iska software Android 7.0 Nougat hai jis par company ka apna user interface bhi moujood hai.

Z60 ki baat karein to design mein decent dikhne wala ye handset light weight hai aur matte finish rear panel ke saath aapko milta hai. Z60 mein aapko kewal 5,500 INR ki kimat mein dual bokeh mode jaisa feature mil raha hai. Iske dono front aur rear cameras 5 MP ke hain jo flash light ke saath aate hain. Ismein aapko 2,500mAh ki powerful battery milti hai jo is smartphone ke din bhar ke mixed usage ke liye enough hai. Iski box accessories bhi Z70 aur Z80 jaisi hi hain. Saath hi ismein 16GB ki internal memory hai aur 5 inch ki display hai. Lekin ismein fingerprint sensor nahi diya gaya hai.