Lenovo ne aaj apna wo smartphone launch kiya jiska intezaar kaafi samay se ho raha tha- Killer 8 Note. Ye smartphone Venom Black aur Fine Gold colors mein 2 storage variants mein launch kiya gya hai jismein se ek 3GB RAM aur 32GB internal memory ke saath uplabh hoga jiski kimat hogi 12,999 INR aur doosra variant 4GB RAM aur 64GB inbuilt storage ke saath 13,999 INR ki kimat par milega.

Saath hi is handset ke saath kuch launch offers bhi announce kiye gaye hain jaise ki kindle padhne walon ko e-books par 80% tak off, idea users ko 56 dinon ke liye 64GB 4G data aur unlimited calls kewal 343 INR mein aur Moto Sports Headphones 1599 INR se ghatkar kewal 699 INR mein milega.

Agar specifications ko dekhein to bhi yeh ek behtar budget smartphone hai. K8 Note mein 5.5 inch ki full HD display hai jo Corning Gorilla Glass dwara protected hai. Is phone mein 64 bit 2.3 GHz Deca Core MediaTek Helio X23 processor hai jiske saath yahaan Mali T880 MP4 GPU bhi hai.

K8 Note mein 2 rear cameras hai, pehla 13 MP dual Led CCT flash aur PureCel Plus sensor ke saath aur doosra 5 MP depth lens ke saath. Yahaan aapko 13 MP ka front camera bhi mil raha hai jismein bhi LED flash light moujood hai. Is dual SIM handset mein 4000mAh ki battery hai jo 15W ke turbo charger ke saath aayegi aur software ki baat karein to ye phone Android 7.1.1 Nougat par chalta hai.

K8 Note mein microSD slot bhi hai jiske dwara aap memory ko 128GB tak aur badha sakte hain. Is phone mein Dolby Atmos sound system hai aur ye TheaterMax technology ke saath aayega jo aapko crystal clear sound ke saath behtar cinematic experience bhi dega. Saath hi ismein fingerprint sensor bhi moujood hai aur ye splash resistant hai. Iske connectivity features hain 4G VoLTE, 3G / HSPA+, EDGE / GPRS, Wi-Fi 802.11 b/g/n, Bluetooth 4.1, Micro USB port, USB OTG, GPS, / A-GPS aur 3.5mm audio jack.