LG ne July ke mahine mein Q6 ke 3 variants alag alag daamon par launch kiye, jabki India mein pichle hi mahine iska kewal 1 variant aaya jo 3GB RAM aur 32GB ki storage ke saath 14,999 INR ki kimat par uplabdh hai. Halaanki LG Q6 ki kimat uske specs ko dekhte huye behad attractive hai. Ye kehna galat nahi hoga ki company is smartphone ki kimat dwara budget smartphone khariddaaron ko aakarshit karne ki koshish kar rahi hai.

Kimat ke alawa iske baaki features kaise hain, aaiye jaante hain is detailed review mein.

Design

LG Q6 5.5 inch ki display ke saath aata hai, aur 5.5 inch display ke saath aane waala ye sabse comfortable aur compact smartphone hoga. Other 5.5 inch smartphones ke comparison mein iska size aur weight dono hi kam hai aur haath mein pakadne par iska look aur feel dono behad achhe hain.

LG Q6 7000-series ke aluminium frame ke saath banaaya gaya hai, jiski rounded edges hai aur ye features ise ek premium look dete hain.  Iska back panel plastic ka hai aur non-removable hai. Ismein dual SIM slot hai aur power button aur volume rocker ko left edge par jagah di gayi hai, jo dekhne mein achhe lag rahe hain.

LG Q6 mein display par Corning Gorilla Glass hai aur ye 18:9 aspect ratio ke saath aati hai. Iska weight kewal 149 grams hai. 5.5 inch ki full HD+ display ke saath aane waala ye behad light weighted phone hai, jiska design behad khoobsoorat hai. LG Q6 ko military grade certification bhi praapt hai, jiska matlab ye ek well-built aur sturdy device hai.

LG Q6 Display

LG Q6 ki display 5.5 inch ki hai jiska resolution hai 2160×1080 pixels, jo detailing ke liye achha hai. Is handset par aap behtar quality ke saath videos enjoy kar sakte hain. But, ye display 4K video files ko support nahi karti, jo iski ek kami ki tarah gina jaa sakta hai. Otherwise, display ki brightness aur colors behad achhe aur attractive hain.  Iski display aapko is budget mein achha experience de sakti hai.

Performance

LG Q6 mein 64 bit Octa Core Qualcomm Snapdragon 435 processor hai jiski adhiktam clock speed 1.4 GHz hai, Ismein Adreno 505 GPU hai. Is smartphone ki performance aur interface smooth hai, ye multi-tasking ko bahut achhe se handle karta hai. Iske saath hi light games bhi is par smoothly khele jaa sakte hain, lekin heavy games jaise ki Asphalt 8 khelne waalon ko is phone se nirasha hi milegi . According to price-range is processor aur iski performance ko above average kaha jaa sakta hai.

LG Q6 mein 3GB ki RAM aur 32GB ki inbuilt memory hai, jismein se aapko lagbhag 22GB hi free mil sakegi. Achhi baat ye hai ki ismein updated Android 7.1.1 Nougat OS hai.

Saath hi LG Q6 mein fingerprint scanner nahi milega, lekin iski jagah face recognition security feature ne le li hai, jo kaafi fast hai. But fingerprint scanner mein aap 5 fingerprint set kar sakte hain, lekin yahaan aap kewal ek face set kar paayenge. Saath hi face recoginition ko setup karne ke liye aapko koi pattern ya PIN set karna padega. But iska face recognition feature kam light mein aapka saath nahi dega aur aapko pattern se hi kaam chalana padega.

Camera

LG Q6 mein 13 MP ka rear camera hai, jo detailed aur quality images capture karta hai. In images mein aapko achhe colors aur sharpness nazar aayegi. Camera ka focus bhi quick hai aur iska viewfinder green squares mein aapko focus points automatically darshata hai.  Is handset ka ye camera low-light situations mein bhi aapko behtar quality ki images deta hai.

13 MP ke rear camera dwara banaayi jaane waali videos bhi achhi aati hain, lekin unka resolution full HD tak hi limited hai. Iska front camera, jo ki 5 MP ka hai, wo aapko average selfie de paata hai. LG Q6 mein aapko Square camera mode bhi milta hai jo LG G6 mein diya gaya tha.

Battery

LG Q6 ki battery 3000mAh ki hai, jo mixed usage ke saath aapke smartphone ko poore din alive rakh sakti hai. Haalanki ismein aapko koi fast charging support nahi milta aur iska charger bhi 1.2 amp ka hai, jo thoda nirashajanak hai.

Lekin yahaan aapko ‘game battery saver’ naam ka feature milta hai, jiske dwara games ka resolution kam karke battery power ko save kiya jaa sakta hai.

Iske alawa iske diye gaye ‘Break Time’ feature se bhi aap games ko pause karke aur brightness aur processor ki performance ko reduce karke battery save kar sakte hain.

Other features

Ismein dual SIM slot hai, pehle slot mein aap ek nano SIM aur ek microSD card lagaya jaa sakta hai, jabki doosre slot mein aap doosra nano SIM laga sakte hain. Is handset ki ek aur kami hai Type-c port ka na hona. Ismein aapko micro USB port milta hai jo kisi fast charging ko support nahi karta. Iske alawa ismein 4G VoLTE, Wi-Fi 802.11 ac, Bluetooth, GPS, USB OTG aur 3.5mm audio jack hain.

Conclusion

LG Q6 overall ek beautiful, decent dikhne wala smartphone hai, jiski performace bhi achhi hai. Iski 18:9 ki display jo ki ab smartphones ka naya trend ban chuki hai,  iska sabse bada good point hai. Ek compact aur behad light weighted handset mein bhi aapko 5.5 inch ki FHD+ display milna iska major selling point ho sakta hai.

Is budget mein ye handset aapko Camera aur Performance bhi achhe hi de raha hai, lekin battery mein thodi kami hai. Major point ye hai ki ye aapko ek bade charger aur fast charging support ke saath nahi milta. Iske alawa ismein Type-C port bhi missing hai.

Lekin aakhir mein hum yahi kahenge ki 14,999 INR mein display aur camera ko dekhte huye, LG Q6 ek acchi deal hai.