Chinese smartphone manufacturer, Meizu ne twitter par ek teaser post kiya hai jise dekhar saaf taur par pata chalta hai ki company India mein ek naya smartphone new year se pehle lekar aane wali hai. Lekin company ki taraf se launch event ki koi details ya khabrein abhi nahin aayin hain.

Is teaser image mein ‘6’ number mention kiya gaya hai aur dual rear camera ka hint bhi diya hai, andaza lagaaya jaa raha hai ki ye camera Meizu ke M6 Note jaise hain. Rumors ke according December yaani ki coming month mein company M6 Note ko India mein launch kar sakti hai.

Meizu M6 Note August mein home country China mein launch kiya gaya tha. Ismein 5.5 inch ki full HD display hai jis par upar 2.5D curved glass lagaya gaya hai. Ye smartphone 2.0 GHz Octa core Qualcomm Snapdragon 625 processor dwara sanchaalit hota hai jismein Adreno 506 GPU bhi moujood hai. Ye Android 7.1.2 Nougat par chalta hai jis par company ka apna UI Flyme OS 6 hai.

M6 Note mein dual rear cameras hain jismein 12 MP ka primary aur 5 MP secondary rear camera shaamil hai jo dual tone quad LED flash light aur f/1.9 aperture ke saath aayenge. Iska front camera 16 MP ka hai jismein f/2.0 aperture diya gaya hai. Company ne ismein 4000mAh ki battery di hai jo fast charging technology ke saath aati hai aur lagbhag 1 din aaram se aapka saath de sakti hai.

M6 Note mein 3 storage variant diye gaye hain. 3GB RAM aur 16GB internal storage ke saath aane waale M6 Note ka price CNY 1099 jo lagbhag 11,000 INR hai. Doosra variant 4GB RAM aur 32GB inbuilt memory ke saath aayega jiska cost CNY 1299 hai, lagbhag 12,500 INR. Iske alawa iska ek aur version 4GB RAM aur 64GB ROM ke saath CNY 1699 ka hai, around Rs. 16,500.

Halaanki, India mein inmein se kaun sa variant launch hoga ya fir sabhi versions aayenge, ye kehna abhi thoda mushkil hai.