Reliance ke Jio Phone ko takkar dene ke liye ab Bharat ki ek aur smartphone company, Micromax ne telecom operator BSNL ke saath milkar aaj apna pehla 4G VoLTE enabled feature phone launch kiya jiska naam hai Micromax Bharat-1. Iski kimat kewal 2,200 INR hai aur ye Black color mein 20 October se poore India mein available hoga.

Micromax ka Bharat-1 BSNL ke kewal 97 INR per month ke tariff plan mein unlimited calls aur unlimited data offers deta hai. Iske zariye aap 100 se adhik TV channels aur hazaaron songs ko access kar sakte hain. Ismein aapko ek advantage ye bhi milega ki aap ismein kisi bhi network ki SIM chala sakte hain, jabki Jio Phone mein sirf Jio SIM chalti hai.

Bharat-1 mein dual SIM slot hai aur second SIM slot 2G /3G SIM ko bhi support karta hai. Saath hi ye 22 regional language support ke saath aata hai aur ismein kayi entertainment apps pre-loaded hain jaise ki Live TV, Music, Movies and Videos.

Bharat 1 mein 2.4 inch ki QVGA display hai jiska pixel resolution 320 x 240 pixels hai aur ye dual core Qualcomm Snapdragon 205 processor par chalta hai jiski clock speed 1.1GHz hai aur ismein Adreno 304 GPU bhi hai. Is dual SIM based feature phone mein 512 MB ki RAM aur 4GB internal storage hai jise micro SD card slot ke through badhaya bhi jaa sakta hai.

Is feature mein aapko dono front aur rear camera bhi milte hain. Iska front camera 0.3 MP ka hai aur iska rear camera 2 MP ka hai. Micromax ka Bharat 1, 2000mAh ki battery ke saath aata hai jo lagbhag 2 din tak iska saath deti hai. Iske connectivity features mein 4G VoLTE, 3G / HSPA+, EDGE / GPRS, Wi-Fi 802.11 b/g/n, Bluetooth 4.1 LE, GPS, Micro USB 2.0 port aur 3.5mm audio jack shaamil hain.