Aaj ke samay mein social networking sites par active rehna bahut zaruri hai taaki samaaj aur duniya mein chal rahi sabhi khabron aur muddon se hum avgat rahein aur saath hi apne rishtedaaron aur doston se bhi jude rahein.

Facebook, Twitter, Instagram jaisi kayi applications moujood hai jinke dwara hum social networking sites ka anand utha sakte hain, lekin ye sabhi applications videshi hain aur angrezi bhaasha ke maadhyam se hi chalaayi jaa sakti hain. Doosri taraf  bhaarat ki aadhi se jyada janta kewal hindi bhaasha ke saath hi sehaj mehsoos karti hai aur isi kaaran wo ab tak social networking sites se nahi jud paayi hai. Isi ko dekhte huye maatr bhaasha Hindi mein launch ki gayi social networking app ‘Mooshak’.

Bhaarat ke chote chote shahron aur zilon mein kayi log hain jo social networking sites par aana to chahte hain lekin kewal Hindi bhasha mein hi comfortable mehsoos karte hain. Mooshak theek Twitter jaisi hi aap hai lekin Hindi bhasha mein.

Mooshak ko kaise Set up karein

Mooshak ko aap Google ke Play Store se download karein. Iske baad apna account banaane ke liye Facebook ya Google se sign in kar sakte hain ya Mooshak ki nayi id banaayein. Iske baad mobile number daalte hi aapko OTP milegi aur uske baad aapko apna Mooshak ID likhna hai jo kabhi nahi badla jaa sakta. Fir aap Mooshak app ka istemaal karne ke liye taiyaar hain.

       

Mooshak ke features

Mooshak mein duniya bhar ki khabrein Global feed jise yahaan cahupaal naam diya gaya hai, par check ki jaa sakti hain. App open karte hi sabse pehle aapko lokpriy ya jo bhi trending posts hain unke feeds dikhaayi denge. Yahaan bhi aap retweet kar sakte hain. Jo moosh aapko pasand aaye, unhein like karne ka bhi option hai.

Twitter ki hi tarah yahaan trending moosh aur trending profiles ke option bhi dikhenge jinse aap jud sakte hain. Aap apna moosh likh sakte hain jiske liye 500 characters ki word limit di gayi hai. Logon ko follow kar sakte hain, follower bana sakte hain, ityaadi. Lekin ye sab kuch yahaan aapko apni maatr bhasha Hindi mein milega.

\Mooshak ka Performance

Mooshak ek Hindi social networking application hai jise banaane mein developers ne achha kaam kiya hai. Ye ek easy to use app hai jise koi bhi saadhaaran sa insaan aaraam se apni maatr bhaasha mein istemaal kar sakta hai. Mooshak ka interface simple aur accha hai, saath hi ye ek light app hai jo smoothly chalti hai aur battery bhi drain nahi kar rahi.

Mooshak ke saath hamaara anubhav

Mooshak ko aap Twitter ka Hindi roopantar keh sakte hain. Is app par bhi aap duniya bhar ke trending posts check kar sakte hain, un par apni pratikriya aur vichaar vyakt kar sakte hain. Ab tak kewal Hindi ka gyaan rakhne waale log jo social networking sites se nahi jud paaye the, ab Mooshak dwara un sabhi India ke logon ke liye is tarah ki pehli app launch hui hai, jise wo behad aasaani se istemaal kar sakte hain aur duniya ke kisi bhi kone mein reh rahe logon se jud sakte hain.