Rumors ko sahi prove karte huye, HMD Global ne aaj India ke ek press event mein Nokia 2 launch kiya. Ye ab tak ka sabse affordable Nokia smartphone hai jiska average global price 99 Euros hai yaani ki lagbhag 7,500 INR. Black, White aur Copper Black color options mein milne waala Nokia 2 mid-November se sale ke liye available hoga.

Halaanki company ne iska Indian price abhi tak nahi bataya hai, lekin iske baare mein announce hote hi hum aapko zaroor update karenge.

Ab specifications ki details ke baare mein baat ki jaaye to, Nokia 2 5 inch HD LTPS LCD In-Cell display ke saath aayega jis par protection ke liye Corning Gorilla Glass 3 layer hogi. Ye handset 1.3 GHz quad core Qualcomm Snapdragon 212 chipset dwara sanchaalit hoga aur iske saath Adreno 304 GPU aur 1GB ki LPDDR3 RAM bhi hogi.

Nokia 2 mein 8 MP ka auto focus rear camera hai jo LED flash light ke saath aayega aur iska selfie camera 5 MP resolution ka hoga. Ismein 4100mAh ki badi battery lagaayi gayi hai jo company ke anusaar aapko poore 2 din ka battery backup bade aaraam se de sakti hai. Iska matlab hai ki yadi aap videos dekhein, games khelein aur unlimited calls bhi karein to bhi iski battery 1 din se to jyada hi aapka saath degi.

Is dual SIM smartphone mein 8GB ki flash storage hai jise aap microSD card slot dwara additional 128GB tak badha sakte hain. SD slot that takes up to 128GB card. Nokia 2 IP52 certified hai jiska matlab ye ek splashproof handset hai aur ye Andorid 7.1.1 Nougat OS par chalta hai, jo baad mein upgrade hokar Android 8.0 Oreo hoga.

Iska other connectivity options mein 4G VoLTE, 3G / HSPA+, EDGE / GPRS, Wi-Fi 802.11 b/g/n, Bluetooth 4.1, GPS + GLONASS, Micro USB port aur 3.5mm audio jack shaamil hain.