Hazaaron rumors ke baad finally OnePlus ne apne fans ke liye ek good news announce ki hai ki OnePlus 5T, 16th of November ko launch hone waala hai. Company ne khud tweet karke ye btaya hai ki OnePlus 5T ka launch event isi mahine ki 16 taarik ko Brooklyn, NewYork mein hone wala hai. Saath hi ek teaser video bhi post kiya gaya hai.

OnePlus fans ke liye ek badi khabar ye bhi hai ki is baar company is event ke liye tickets sell kar rahi hai. Is event mein shaamil hone ke liye aap 8 November se $40 ka ticket kharid sakte hain aur pahunch sakte hain OnePlus 5T launch par.

OnePlus 5T ki theme hai – “A New View”, jo saaf taur se ishara kar rahi hai ki is baar company nayi display ke saath phone launch karne waali hai, jo ki bahut badi baat hai. OnePlus 5T ka launch event theek 11 A.M. (Eastern Time) par shuru hoga, Indian time ke according raat 9.30 pm baje. Is event ka live stream aap YouTube channel par bhi dekh sakte hain.

Rumors par gaur farmaayein to, OnePlus 5T mein 6 inch ki full HD+ Optic AMOLED display aa sakti hai jo 18:9 aspect ke ratio ke saath aayegi. Processor ke baare mein abhi kuch nahin kaha jaa sakta, lekin camera ko lekar afvaahein aisi hain ki ye 20 MP ke front facing camera ke saath aayega.

OnePlus 5T ke 16 MP aur 20 MP ke dual rear cameras ke saath aane ke aasaar hain. Saath hi iski battery bhi pehle ke mukaable badi ho sakti hai. Iske wala ye Android 7.0 Nougat par chalega ya fir ismein Android 8.0 Oreo software aata hai, is baare mein kuch nahin kaha jaa sakta. Is handset ke anay features jaise ki RAM, ROM, processor, dual SIM ityaadi ke baare mein jaanne ke liye bhi humein launch event tak ka intezaar karna padega.

Is smartphone ke security feature yaani ki fingerprint scanner ke baare mein ye kaha jaa raha hai ki ye is baar rear panel par aa sakta hai. Iske alawa connectivity feature mein 4G VoLTE, Wi-Fi ac, Bluetooth 5, GPS + GLONASS, USB Type-C port pramukh hain.