Leading smartphone maker, Panasonic ne aaj Eluga series ke do naye smartphones- Eluga A3 and A3 Pro India mein launch kiye. Panasonic ne haal hi mein actress Tapsee Pannu ko apna naya brand ambassador bhi chuna hai jo is launch event mein moujood thi.

Eluga A3 aur A3 Pro Mocha Gold, Gold aur Grey colors mein 10 August, 2017 se Panasonic brand stores aur lagbhag sabhi bade offline retail outlets par poore India mein available hoga. Dono smartphones metal unibody design ke saath aayenge aur inmein kewal processor aur storage ka antar hoga aur inki kimat hogi Rs. 11,290 aur Rs. 12,790.

Eluga A3 aur A3 Pro mein 5.2 inch ki HD display hai jo Asahi Dragon Trail Glass dwara protected hai. In dono smartphones mein 3GB ki RAM, fingerprint scanner jo ki home button mein hi integrated hai aur 4000mAh ki non removable battery hai, jo super fast charging support ke saath aayegi.

Eluga A3 mein 64 bit 1.25 GHz quad core MediaTek MT6737 processor hai, jabki Eluga A3 Pro mein 1.3 GHz Octa Core MediaTek MT6753 chipset hai. Eluga A3 16GB ki internal memory ke saath aayega, wahin doosri taraf A3 Pro mein 32GB ki onboard memory hai. Dono hi smartphones mein microSD card ke liye expansion slot bhi hai jisse memory ko 128GB tak aur adhik badha sakte hain.

Agar hum camera ki baat karein to dono smartphones 13 MP ke auto focus rear camera ke saath market mein uplabh honge jismein Led flash light aur phase detection auto focus feature bhi moujood hoga. Front facing camera 8 MP ka hoga. Eluga A3 aur A3 Pro mein company ka virtual assistant ARBO bhi hai.

Dono smartphones latest Android version Android 7.0 Nougat OS par chalte hain aur dono mein dual SIM connectivity bhi hai. Connectivity options mein shaamil hain – 4G VoLTE, 3G / HSPA+, EDGE / GPRS, Wi-Fi 802.11 b/g/n, Bluetooth 4.0, GPS, Micro USB port aur 3.5mm audio jack.