Samsung ne kal New York city mein ek event mein apna naya aur premium smartphone ‘Galaxy Note 8’ launch kiya. Galaxy Note 8  Midnight Black, Maple Gold, Orchid Grey aur Deep Sea Blue colors mein 15th September se available hoga, jabki iske pre-order aaj se hi shuru ho chuke hain.

Dual rear camera ke saath aane waale is handset ki kimat USD 929 hai jo lagbhag 59,500 INR hogi. Wahin doosri taraf U.K. mein iski  kimat £869 aur Europe mein €999 hogi.

Galaxy Note 8 specifications bhi utne hi acche hain jitna ki iska look, ye metal body se bana smartphone 6.3 inch ki Quad HD+ Super AMOLED infinity display ke saath aata hai. Ismein 6GB ki RAM, 64GB ya 128GB ya 256GB ki internal memory moujood hai jise aap microSD card ki sahayta se aur 256GB tak badha sakte hain.

Galaxy Note 8 Octa Core Qualcomm Snapdragon 835 processor dwara sanchaalit hota hai aur iska ek anay variant Octa Core Samsung Exynos 9 Series 8895 processor ke saath aata hai. Ye smartphone Android 7.1.1 Nougat software ke saath uplabdh hoga jismein hybrid dual SIM slot hai, jiska arth hai ki aap second SIM slot ko microSD slot ki tarah bhi istemaal kar sakte hain.

Galaxy Note 8 ek dust aur water resistant handset hai jismein 3300mAh battery moujood hai jo wire aur wireless charging dono mein fast charging support karti hai. Note 8 mein do 12 MP ke camera moujood hai, jismein se primary camera LED flash light, f/1.7 aperture aur OIS ke saath aayega aur doosra secondary camera telephoto lens, f/2.4 aperture aur 2x optical zoom ke saath aayega.

Galaxy Note 8 ka front camera 8 MP resolution, f/1.7 aperture aur wide-angle lens ke saath aata hai jo selfie click karne ke liye kaafi hai.  Is smartphone ke connectivity options hai 4G VoLTE, 3G / HSPA+, EDGE / GPRS, Wi-Fi 802.11ac VHT80 MU-MIMO, Bluetooth v 5.0, GPS with GLONASS, USB Type C 3.1 port, NFC, MST aur 3.5mm audio jack.