Sony Mobiles ka Xperia XZ1 jo last month IFA 2017 mein launch hua tha, use aaj India mein 44,990 INR mein ek press event dwara introduce kiya gaya. Xperia XZ1 ko Moonlit Blue, Venus Pink and Warm Silver colors mein aaj se hi India ke sabhi leading retail outlets se praapt kiya jaa sakta hai.

Xperia XZ1 ki khaas baat ye hai ki ismein ek 3D creator app hai, jiski sahayta se aap 3D effect ke saath photos click kar sakte hain. Iske alawa ek achhi baat ye hai ki ye Android le latest version yaani ki Android 8.0 Oreo par chalta hai.

Other specifications ki baat karein to, is smartphone mein 5.2 inch ki full HD HDR Triluminos X-Reality display hai jis par Corning Gorilla Glass 5 ki coating hai. Xperia XZ1 Octa Core Qualcom Snapdragon 835 processor dwara sanchaalit hota hai jiske saath Adreno 540 GPU bhi diya gaya hai.

XZ1 mein hybrid sual SIM slot hai jo aapko second SIM slot ko microSD card slot ki tarah bhi istemaal karne ki anumati deta hai. Is handset mein 2700mAh ki battery di gayi hai jise Qnovo Adaptive charging technology ki madad se aap jaldi charge kar sakte hain aur din bhar ke mixed usage ke liye ye battery kaafi hai.

Ab baat kartein hain Xperia XZ1 ke camera ki, Iske front par 13 MP ka lens hai jismein f/2.0 aperture, 22mm wide angle lens, full HD video recording jaise features moujood hain. Iska rear camera 19 MP ka hai jo LED flash light, f/2.0 aperture, 5-axis stabilization aur 4K video record karne ki capability ke saath aayega.

Xperia XZ1 mein security purpose se fingerprint scanner bhi hai, jo front button mein hi shaamil hai aur saath hi ye handset IP68 certification dwara dust aur water resistant bhi hai. Iske connectivity features hain- 4G VoLTE, 3G / HSPA+, EDGE / GPRS, Wi-Fi 802.11 ac MIMO, Bluetooth 5.0, GPS, Micro USB Type-C port.