Swipe Technologies ne aaj apna naya 4G enabled smartphone india mein launch kiya jo VR headset ke saath aayega aur iska naam hai Elite VR. Elite VR aaj se hi online leading retailer ShopClues par Rs. 4,499 rupay mein uplabdh hai. Is smartphone ko aap Black, White, Red aur Gold colors mein kharid sakte hain.

Agar hum specifications ki baat karein to, Elite VR mein 5.5 inch ki HD display hai aur ye smartphone 1.3 GHz quad core MediaTek MT6737 64-bit processor dwara sanchaalit hota hai aur ismein Mali T720 GPU moujood hai. Elite VR mein aapko 2GB ki RAM aur 8GB ki internal memory milti hai, jo shaayad aapko kam lage, lekin ise aap microSD card ki madad se badha bhi sakte hain.

Elite VR mein 13 MP ka auto focus rear camera hai jismein LED flash light hai aur front camera bhi 5 MP resolution ke saath moujood hai, jo selfie click karne ke liye thik hai. Elite VR ki battery 3000 mAh ki hai jo din bhar ke mixed usage ke liye kaafi hai aur is price range ko dekhte huye bhi achhi hai.

Is dual SIM based smartphone mein kewal ek kami ye hai ki Elite VR Android 6.0 Marshmallow software par chalta hai, jabki adhiktar entry level smartphones bazaar mein Android 7.0 Nougat ke saath uplabdh hain. Elite VR ke connectivity options hain 4G VoLTE, 3G / HSPA+, EDGE / GPRS, WiFi 802.11 b/g/n, Bluetooth 4.0, GPS, Micro USB 2.0 port aur 3.5mm audio jack.

Company ki maanein to yeh sabse kifaayti smartphone hai jo VR headset ke saath chal sakega. Elite VR ko kuch offers ke saath launch kiya gya hai jaise ki Standard Chartered credit ya debit card aur Kotak Mahindra credit card ka upyog karne waalon ko 10 percent ka instant cashback milega. Iske alawa Make My Trip ki taraf se Rs. 3000 ka travel voucher ka bhi offer hai.

Price range ko dekhte huye Elite VR acche specifications ke saath uplabdh hai, lekin isi price range mein aap Intex Aqua 5.5 VR, Xolo Era X1, iVoomi Me 4 jaise vikalp bhi chun sakte hain.