TP-Link jo abhi tak networking devices ke liye hi jaana jaataa hai, ab smartphones ki market mein utarne ki taiyaari kar raha hai. Halaanki company ki taraf se iski koi updates ya announcement nahi ki gayi hai, lekin is premium smartphone ki tasveerein aur kuch features leak ho chuke hain.

Neffos line-up ke under ban raha ye smartphone ek high-end smartphone hai jaisa ki aap niche di gayi tasveer mein dekh hi sakte hain.

Is smartphone ka naam abhi nahi pta chal saka hai, lekin iske kuch specs mil chuke hain. Ismein full screen bezel-less display hai. Kewal top aur bottom edges par behad thin bezels hain aur ye 18:9 aspect ratio ke saath hi aayega. Iske alawa is handset mein dual rear camera setup hai aur uske thik niche fingerprint scanner diya gya hai.

TP-Link ke is handset mein Snapdragon 835 processor ho sakta hai aur uske saath 6GB ki RAM hogi. Agar storage ki baat karein to, shayad company is handset mein 256GB tak ka storage dene waali hai. Lekin ismein aur versions bhi aayenge ya nahin, ye abhi kehna thoda mushkil hai.

Iske alawa camera section mein 16 MP ka primary auto focus rear camera hoga aur secondary rear camera ka resolution 20 MP hoga jo telephoto lens ke saath aayega aur ismein 2X optical zoom bhi hoga.

Iske alawa iski battery kitni hogi, software, dual SIM support, etc. features ke baare mein abhi koi jaankaari nahi mil paayi hai.

Lekin ye zaroor kaha jaa sakta hai ki company ka is smartphone ko launch karna company strategy mein bahut bada change hai aur change company ko kitna success deta hai, ye to is handset ke launch ke baad hi pta chalega.

Ab dekhna ye hai ki company is smartphone ko kab launch karti hai aur market mein ise kaisa response milta hai.