Vivo ka selfie focused smartphone Vivo V7 abhi abhi New Delhi, India mein ek press event mein launch kiya gaya. Is launch se thik pehle, pichle week mein 16th of November ko ye smartphone company dwara Indonesia mein launch hua tha jiski khaas baat hai iska 24 MP ka selfie camera. Indonesia mein iski kimat Rp 3,799,000 rakhi gayi jo approximately 18,300 INR hai.

India mein, Vivo V7 Matte Black and Gold color options mein 18,990 INR ki kimat par kewal Flipkart par available hai.

Dekhne mein behad khoobsoorat lagne waale is smartphone mein 5.7 inch ki edge-to-edge full view 2.5D curved glass screen hai jiska resolution 1440 x 720 pixels hai. Is 18:9 ratio ki display par Corning Gorilla Glass layer bhi di gayi hai aur ye 1.8 GHz Octa Core Qualcomm Snapdragon 450 14nm processor par chalta hai jismein Adreno 506 GPU bhi hai.

Vivo V7 mein 24 MP ka selfie snapper hai jismein LED flash light aur f/2.0 aperture bhi moujood hain. Iska rear camera 16 MP ka hai jo aapko LED flash light, f/2.0 ke aperture, OmniVision OV16880 sensor aur PDAF jaise features ke saath milta hai.

Ye dual SIM handset FunTouch OS 3.2 software par chalta hai jo Android 7.1.2 Nougat par based hai. Iski battery 3000mAh ki hai jise remove nahi kiya jaa sakta aur full view display hone ke kaaran is baar fingerprint scanner bhi rear panel par hai. Vivo V7 mein 4GB ki RAM aur 32GB ki inbuilt storage moujood hai.

Is handset mein ek microSD card slot bhi diya gaya hai jo 256GB tak ka card accept karta hai. Saath hi iske other connectivity options mein 4G VoLTE, 3G / HSPA+, EDGE / GPRS, Wi-Fi 802.11 ac, Bluetooth 4.2, GPS + GLONASS, Micro USB 2.0 port aur 3.5mm audio jack shaamil hain.