Jaisa ki humne apni news dwara aapko confirm kiya tha, Xiaomi ne aaj apna flagship smartphone launch kar diya hai, jiska naam Mi A1 hai. Is handset ko ek press event mein New Delhi, India mein showcase kiya gaya hai aur iski kimat hogi 14,999 INR. Mi A1 online Flipkart aur Mi.com par aur offline Mi Home stores par 12 September se dopahar 12.00 PM se available hoga.

Xiaomi A1 ki highlight ye hai ki ye ek stock Android smartphone hai jiske liye Xiaomi ne Google ke saath tie up kiya hai aur ye purely Android 7.0 Nougat software par chalega, saath hi ismein dual rear cameras bhi honge. Customers ise Black, Gold aur Rose Gold colors mein kharid sakte hain.

Other specifications ki baat ki jaaye to, Mi A1 5.5 inch ki full HD display ke saath aata hai jis par Corning Gorilla Glass protection moujood hai. Ye dual SIM smatphone 2.0 GHz Octa Core Qualcomm Snapdragon 625 14nm processor dwara sanchaalit hoga jismein 4GB ki RAM aur 64GB ki ROM hogi jise aap 128GB tak microSD card dwara badha bhi sakte hain.

Mi A1 mein 12 MP ka primary rear camera hai jo dual tone LED flash light, wide angle lens aur f/2.2 aperture ke saath aata hai, wahin 12 MP ka secondary camera telephoto lens, f/2.6 aperture aur 2x optical zoom jaise features ke saath aayega.

Mi A1 mein rear panel par ek fingerprint scanner bhi moujood hai aur saath hi ismein IR blaster bhi diya gaya hai jiske dwara aap apne ghar ke electronic items ko apne Mi A1 device se operate kar sakte hain.

Mi A1 mein 5 MP ka front facing camera aur 3080mAh ki battery bhi moujood hai. Is handset ke connectivity features hain 4G VoLTE, 3G / HSPA+, EDGE / GPRs, Wi-Fi 802.11 b/g/n, Bluetooth 4.1, GPS, USB Type C port, hybrid dual SIM slot aur 3.5mm audio jack.