Kayi tarah ke rumors ke baad aaj ye confirm ho chuka hai ki Chinese smartphone giant Xiaomi, India mein apna latest budget smartphone launch karne jaa raha hai jiska naam hoga Xiaomi Mi A1. Xiaomi Mi A1 ka global launch India mein 5th of September ko ek press event dwara hoga.

Saath hi ye bhi confirm hai ki is baar Google bhi Xiaomi ke saath unke is aane waale affordable Android One smartphone ke liye kaam kar raha hai.

Xiaomi Mi A1 ke aane ki khabar ki confirmation to mili hi hai, saath hi ye bhi confirm hai ki is smartphone mein 4GB ki RAM hogi, Google dwara Android 7.1.2 Nougat software hoga aur ye Snapdragon 625 processor dwara sanchaalit hoga.

Kuch rumors ke anusaar ye bhi kaha jaa raha hai ki Xiaomi Mi A1 mein 5.5 inch ki full HD display, dual SIM slots aur yahaan tak ki dual rear camera setup bhi moujood hoga. Haalanki ek budget smartphone ko dekhte huye ye bahut hi achhe features hain. Iska price bhi 10,000 INR ke neeche hi ho sakta hai.

Iske alawa Xiaomi Mi A1 ke design, storage aur battery jaise features ke liye shaayad humein iske launch ka intezaar karna padega.

Ummid jataayi jaa rahi hai ki baaki sabhi smartphones ki tarah ye handset bhi record breaking registrations paa sakta hai. Agar India mein Xiaomi smartphones ke sale ki baat karein to ye bhi ek bahut badi khabar hai ki company ne kewal 3 years mein apne 25 million handsets sale kiye hain, jiska matlab hai ki Xiaomi ke lagbhag 22,000 smartphones daily sale hote hain.

India mein kisi bhi smartphone brand ne ab tak itni tezi se apne smartphones nahi sale kiye hain aur naa hi koi brand entry level smartphones ke liye logon ke beech ab tak itna popular ho paaya hai.  Xiaomi ab kewal smartphones ke liye hi nahi balki apne wearables, Purifiers, power bank, etc. sabhi ke liye prachlit hota jaa raha hai. Is samay Xiaomi wearables mein bhi top brand ban chuka hai.