Aaj, 11 September ko Xiaomi Mi MIX 2 launch event ki news to company ne pehle hi confirm kar di thi, lekin Mi Note 3 ke launch ki khabar company ne haal hi mein di. Xiaomi ne aaj ek press event mein Mi MIX 2 aur Note series ka naya handset Mi Note 3 China mein launch kiya.

Dono hi smartphones multiple storage options mein available honge. Mi Note 3 ka 64GB ROM version 2499 yuan ka hoga aur 128GB onboard storage variant aapke liye 2899 yuan mein uplabdh hoga. 128GB ROM variant ko Blue color mein kharidne par iski kimat 2999 yuan hogi.

Doosri taraf Mi MIX 2 ka 64GB internal memory version 3299 yuan ka hoga, 128GB ROM variant 3599 yuan ka hoga aur 256GB inbuilt storage option 3999 yuan mein milega. Iska ek special edition variant jo ceramic body ka hoga aur jismein 8GB ki RAM aur 128GB ki storage milegi, 4,699 yuan mein uplabdh hoga.

Mi MIX 2 5.99 inch ki full view display aur 18:9 aspect ratio ke saath aayega jo 64 bit 2.45 GHz Octa Core Qualcomm Snapdragon 835 processor dwara sanchaalit hoga aur ismein 6GB ya 8GB ki RAM hogi. Is smartphone mein 12 MP ka rear camera hai jo dual tone LED flash light aur 5 MP ke front camera ke saath aayega aur 3400mAh ki battery hogi.

Doosri taraf Mi Note 3 mein 5.5 inch ki full HD display hogi aur ye Octa Core Qualcomm Snapdragon 660 14nm processor par chalega jismein 6GB ki RAM bhi hogi. Mi Note 3 mein 12 MP dual rear cameras honge jinmein se primary camera mein dual tone LED flash, f/2.0 aperture aur 4K video recording hogi. Saath hi front par bhi 16 MP ka selfie camera lagaya gya hai. Is smartphone mein 3500mAh ki battery hogi.

Mi Note 3 aur MIX 2 dono hi Android 7.0 Nougat software par chalte hain jis par MIUI 9 OS skin hai. In dono dual SIM handsets mein fingerprint scanner  bhi moujood hai, MIX 2 ke rear panel par aur Note 3 ke front button mein. Inke connectivity features hain 4G LTE, Wi-Fi 802.11ac, Bluetooth 5.0, GPS +  GLONASS, NFC aur USB Type-C port.