Chinese top most smartphone manufacturer, Xiaomi pichle 2 saalon se har saal ke first quarter mein apna flagship smartphone launch karta aa raha hai. Mi 6 jo ki isi saal April ke mahine mein launch hua,  use abhi 6 mahine bhi nahi beete hain aur Xiaomi ke next flagship smartphone ki khabron se bazaar garm ho chala hai.

Xiaomi ke agle flagship yaani ki Mi 7 ko lekar rumors hain ki company is handset ko, year 2018 ke first quarter mein launch kar sakti hai. Smartphone industry mein hi kisi ne Weibo par Mi 7 ke specifications tak leak kar diye hain.

Isi saal aaye Mi 6 mein bhi company ne kayi achhe features diye aur design ke saath bhi experiment kiya jaise ki four sided 3D glass design, rear camera ke charon taraf 18K ki gold ring, dual 12 MP rear camera aur Snapdragon 835 processor. Ab dekhna ye hai ki Xiaomi apne next flagship Mi 7 mein kaun se features aur design dene waala hai.

Filhaal, maana jaa raha hai ki, Mi 7 mein Samsung ki 6 inch ki OLED display hogi aur ye Snapdragon 845 processor dwara sanchaalit hoga. Iske baaki specifications ko lekar abhi koi information nahi mili hai. Lekin jis tarah 2016 mein March mein Mi 5 aaya aur year 2017, April mein Mi 6 launch hua, isse to yahi lagta hai ki Xiaomi next year ke first quarter mein hi apna next flagship zaroor lekar aayega.

Agar price ke baare mein baat karein, to pichle 2 saalon mein aane waale iske predecessors yaani ki Mi 5 aur Mi 6 dono hi mid-range handsets the jinki kimat lagbhag 25,000 INR thi. Mi 7 ki kimat bhi lagbhag itni hi ho sakti hai.

Iske alawa ye bhi rumors hain ki Samsung aur LG jaisi giant companies bhi first quarter mein hi apne flagships launch kar sakti hain, jaise ki Samsung Galaxy S9 aur LG G7.