ASUS ne aaj India mein apni Zenfone 4 Selfie series announce ki jismein Zenfone 4 Selfie Pro aur Zenfone 4 Selfie ke 2 variants launch kiye gaye. Ye sabhi smartphones kewal Flipkart par 21 September se available honge.

Zenfone 4 Selfie (single front camera variant) ki kimat hogi 9,999 INR hogi aur iska doosra version jo dual front camera ke saath aayega wo 14,999 INR mein uplabdh hoga. Wahin, Zenfone 4 Selfie Pro 23,999 INR ki kimat par sale kiya jaayega.

Zenfone 4 Selfie Pro

Zenfone 4 Selfie Pro mein 5.5 inch ki full HD AMOLED display hogi jis par protection ke liye 2.5D Corning Gorilla Glass layer bhi lagaayi gayi hai. Ye smartphone 2.0 GHz Octa Core Qualcomm Snapdragon 625 14nm processor par chalega aur saath hi Adreno 506 GPU aur 4GB ki RAM hogi.

ASUS ZenFone 4 Selfie Pro

Is handset ka camera hi iski khaasiyat hai. Ismein 24 MP ka primary front camera hai jo f/1.8 aperture, dual tone LED flash light, PDAF, Sony IMX362 sensor aur 4K video recording ke saath aata hai. Company ki maanein to is handset mein ASUS ki Super Pixel Engine technology hai jo aapko low-light mein 2x brighter images click krne mein aur 4K UHD resolution ki video banaane mein sahaayak hogi.

Is handset mein ek 5 MP ka secondary front camera bhi hai jise company ne ‘wefie’ ka naam diya hai jo group selfies aur aapke surrounding environment ko camera mein behtar tareeke se click kar paayega.

Zenfone 4 Selfie Pro ka rear camera 16 MP resolution ke saath aata hai jismein Sony IMX315 sensor aur dual LED flash light hai. Ismein 64GB ki onboard memory aur microSD slot bhi moujood hai jiske dwara memory ko 2TB tak badhaaya jaa sakta hai.

Zenfone 4 Selfie (Dual front camera variant)

Zenfone 4 Selfie mein 20 MP ka primary front camera aur doosra 8 MP camera hai. Primary camera dual tone LED flash, f/2.0 aperture aur PDAF ke saath aayega, jabki secondary 8 MP camera mein 120 degree wide angle lens hai. Iska front camera bhi 16 MP ka hi hai jo dual tone LED flash aur EIS jaise features ke saath aata hai. Is handset mein 4GB ki RAM aur 64GB ki storage hai.

Zenfone 4 Selfie ki display 5.5 inch ki hai jis par 2.5D curved glass layer hai aur ye 1.4GHz Octa Core Qualcomm Snapdragon 430 processor dwara sanchaalit hota hai.

Zenfone 4 Selfie (single camera variant)

Zenfone 4 Selfie Single camera variant ki display aur processor wahi hain jo iske dual front camera variant mein istemaal kiye gaye hain. Is smartphone mein 3GB ki RAM aur 32GB ki memory hai.

Is dual SIM smartphone mein 13 MP ka auto focus rear camera hai jo dual tone LED flash light, PDAF ke saath aata hai, jabki iska 13 MP ka front camera bhi soft LED light aur f/2.0 aperture ke saath aayega.

In sabhi smartphones mein Zen UI 4.0 OS hai jo Android 7.0 Nougat OS par based hai aur sabhi mein 3000mAh ki battery hai jo fast charging support ke saath aati hai. Inke connectivity features hain- 4G VoLTE, 3G / HSPA+, EDGE / GPRS, Wi-Fi 802.11 b/g/n, Bluetooth 4.0, GPS + GLONASS aur dual SIM support.